Kuri uyu wa Kane, tariki ya 12 Kamena 2025 saa Tatu, indege ya sosiyete Nyafurika Air India, yarimo abantu bagera kuri 242, yakoze impanuka ikomeye hafi y’ikibuga cy’indege cya Sardar Vallabhbhai Patel giherereye mu mujyi wa Ahmedabad, Leta ya Gujarat mu Buhinde. Indege yari yerekeje mu murwa mukuru w’u Bwongereza, London, ubwo yakoze impanuka mu gace ka Meghani, hafi y’aho ibirindiro bya kompanyi y’indege biri.
Ababonye ibyabaye bavuze ko indege yaturitse ikibasira ahantu hanini, ndetse hakurikiraho umuriro mwinshi n’umwotsi w’umukara wagaragaraga uva ahabereye impanuka. Nubwo nta mibare y’abapfuye iratangazwa ku mugaragaro, inzego z’ubutabazi zageze aho byabereye mu gihe gito, zikomeje igikorwa cyo gutabara no gushaka abarokotse.
Nyuma y’iyi mpanuka, Minisitiri w’Ubutegetsi bw’Igihugu wa India, Amit Shah, yahamagaye Minisitiri w’Intebe wa Leta ya Gujarat, kugira ngo amenye uko ibintu byifashe no gutanga amabwiriza ajyanye no gukomeza ibikorwa by’ubutabazi. Amit Shah yatangaje ko ashyigikiye inzego z’ubutabazi n’ubuyobozi bwo muri Gujarat mu rugamba rwo gukiza ubuzima bw’abari mu ndege no kwirinda izindi ngaruka.
Guverinoma yashyizeho itsinda rihuriweho n’inzego z’umutekano, abaganga, n’abategetsi, ryoherejwe ku kibuga cy’indege no mu gace impanuka yabereyemo. Hari kandi n’amatsinda y’abategetsi bashinzwe iperereza bagiye gusuzuma impamvu zishobora kuba zateye iyi mpanuka, harimo ikibazo cya tekiniki cyangwa ibindi byago byaba byarabaye mu gihe cyo guhaguruka cyangwa kugwa kw’indege.
Amakuru agezweho avuga ko ibikorwa byo gutabara bikomeje, ndetse abarwayi bakomerekeye muri iyi mpanuka bajyanwe mu bitaro byo mu mujyi wa Ahmedabad. Ikigo gishinzwe indege mu Buhinde (DGCA) cyatangaje ko kiri gukora iperereza ryimbitse ku byabaye, hakaba hategerejwe raporo y’igenzura ry’ibyuma by’indege, uko yakoreshejwe ndetse n’amateka yayo ya serivisi.
Abaturage baturiye ahabereye impanuka babwiwe kwirinda kwegera aho byabereye mu gihe abashinzwe umutekano n’inzego z’ubutabazi bakiri mu gikorwa cyo gucukumbura no gusukura aho indege yaguye. Haracyari urujijo ku mubare w’abapfuye cyangwa abakomeretse, ariko ibitangazamakuru bikomeye birimo The Times of India, The Sun, na Economic Times byemeza ko impanuka yabaye ikomeye kandi iteye impungenge.