Mu gihe ubushyamirane hagati ya Leta Zunze Ubumwe za Amerika na Irani bwari butangiye gukaza umurego, ibihugu bigize Ubumwe bw’u Burayi byahagurutse bisaba ko hakomeza inzira ya dipolomasi aho kwihutira ibikorwa bya gisirikare.
Ibi byabaye nyuma y’uko Irani irashe indege ya drone y’Amerika itarimo abapilote, Amerika ikavuga ko iyo ndege yarasiwe mu kirere mpuzamahanga, naho Irani ikavuga ko yari yarenze imbibi zayo. Nyuma y’iki gikorwa, Perezida Donald Trump yari amaze gutegeka igitero cyo kwihorera ku birindiro bya gisirikare bya Irani, ariko aza kugihagarika iminota 10 mbere y’uko gitangira, avuga ko cyashoboraga guhitana abantu 150 kandi akumva bitari ngombwa kubahitana kubera drone imwe.
Mu rwego rwo gutuza ibintu, Ubumwe bw’u Burayi – burimo u Bufaransa, u Budage n’u Bwongereza – bwasabye ko ibihugu byombi byakoresha inzira y’ibiganiro n’ubwumvikane. Ibi bihugu kandi byasobanuye ko bishyigikiye ishyirwa mu bikorwa ry’amasezerano y’ingufu za kirimbuzi (nuclear deal) yasinywe mu 2015, aho Irani yemeye kugabanya ibikorwa byayo bya nucléaire mu gihe runaka. Amerika yo yigeze kuva muri ayo masezerano mu 2018, ikaba yarahise ishyiraho ibihano bikakaye kuri Irani, ibintu byatangiye guteza impaka ndende.
I Burayi havuzwe impungenge z’uko intambara hagati ya Amerika na Irani ishobora guhungabanya umutekano w’akarere, ubucuruzi mpuzamahanga n’ibikorwa by’ubwikorezi mu nyanja ya Oman na Hormuz, inzira ikomeye y’amavuta ku isi.