Ku wa 30 Kamena Mu Bwongereza, inkiko zahamije Ryland Headley, umugabo w’imyaka 92, icyaha cy’ubwicanyi no gufata ku ngufu Louisa Dunne, umugore w’imyaka 75 wiciwe mu rugo rwe mu mwaka wa 1967.
Iyi nkuru yavuguruwe n’ibimenyetso bikuwe mu ikoranabuhanga rishya rya ADN, nyuma y’imyaka 58 icyo cyaha kibaye, bikaba byabaye rumwe mu manza zamaze igihe kirekire kurusha izindi mu mateka y’Ubwongereza.
Mu ijoro ryo ku wa 30 Kamena 1967, Louisa Dunne yiciwe mu rugo rwe ruherereye mu gace ka Easton i Bristol. Abashinzwe iperereza bavuze ko yari yafashwe ku ngufu, agapfa mu buryo buteye ubwoba. Icyo gihe, ntabwo hari uwari wahamwe n’icyaha, ibintu byashyize igihu ku muryango w’uyu mukecuru w’umunyempuhwe, wari ukunze gufasha abaturanyi be.
Hashize imyaka myinshi dosiye y’icyo cyaha irimo ivugururwa, kugeza ubwo mu 2023 itsinda rishinzwe gukurikirana ibyaha bishaje (cold cases) ryahisemo gusubira mu bimenyetso byari bikiri mu bubiko. Umwenda Louisa yari yambaye ku munsi yiciwemo warabitswe, ndetse n’ibimenyetso by’intoki byari byafashwe kuri fenetre y’icyumba cye. Ibyo bimenyetso byoherejwe gupimwa ADN hakoreshejwe ikoranabuhanga rigezweho, maze havumburwa ko ADN yabonetse ku mwenda ihuye n’iya Ryland Headley, wari warigeze gufungwa muri 1977 ku bindi byaha bifitanye isano n’ihohoterwa rishingiye ku gitsina.
Ubushinjacyaha bwasobanuye ko Ryland Headley yari asanzwe azwiho gushurashura mu bagore bakuze, ndetse ko uburyo yakoresheje mu kwinjira mu nzu ya Louisa no kumugirira nabi bwari busa neza n’ubwo yakoresheje ku bandi bagore bafashwe ku ngufu mu myaka ya 1970.
Mu rukiko rwa Bristol Crown Court, Headley yahakanye icyaha ariko ibimenyetso byatanzwe n’abahanga mu bya ADN, ibitekerezo by’abatangabuhamya ndetse n’inkuru zivuye mu mateka ye y’ihungabana byatumye urukiko rumuhamya icyaha ku itariki ya 30 Kamena 2025. Ategereje gukatirwa igihano gikwiriye ku itariki ya 1 Nyakanga.
Umwuzukuru wa Louisa, Mary Dainton, yatangaje ko yari yaratakaje icyizere cyo kuzabona ubutabera, ariko ko ubu yumva n’ubwo byatinze, umuryango we ubonye ihumure. Yashimye ubwitange bw’abapolisi n’abashakashatsi bitanze imyaka myinshi kugira ngo ukuri kujye ahabona.
Iyi nkuru yashimangiye ko igihe cyose ubutabera bushobora kugerwaho, kabone n’iyo imyaka yaba ari myinshi. Ikoranabuhanga rya ADN rihindura amateka, ryongera icyizere ku miryango yabuze ababo, ko habaho amahirwe yo kubona abakoze ibyaha, kabone n’iyo baba baribagiranye mu mateka.