APR FC ni kipe y’ubukombe hano mu Rwanda, aho mu myaka 32 imaze yatwayemo ibikombe 23 bya shampiyona.
Uyu munsi taliki ya 4 Nyakanga irasubira ku Mulindi aho yashingiwe mu rwego rwo kwizihiza imyaka 32 imaze ishinzwe.
Ubundi iyi kipe yashinzwe mu mwaka wa 1993, ku gitekerezo cya Perezida Paul Kagame. Mbere gato mu mwaka 1992 hari amakipe ya gisirikare yajyaga akina ariko agakina hagati ya batayo nka Nyagatare bagakina na Nasho, …. Perezida Kagame abibonye gutyo aravuga ati “Ubundi twakoze Ikipe imwe tugakina shampiyona?” Nuko mu mwaka wa 1993 RPA, igisirikare gishamikiye ku muryango FPR INKOTANYI cyahise gishinga Ikipe ya APR FC.
Umukino wa mbere APR FC yakinnye yahuye n’Abakombozi bari mu ishyaka rya PSD bari bagiye gusura ku Mulindi. Icyo gihe kandi ni nabwo Volleyball na Basketball zashinzwe.
Aba ni bamwe mu batangiranye na APR FC barimo Uwimana Michael, Lt. Col. Alphonse Muyango, Gen Mubarakh Muganga, Maj Gen Willy Rwagasana, Gen Jean Bosco Kazura n’abandi, ku geza nubu harimo abakiri muri APR FC.
APR FC yatangiranye n’abasivili batatu bari abanyamuryango ba FPR Inkotanyi , ni mugihe batoranyije abakinnyi 32 ari nabo yatangiranye , abo yabatoranyije mu bakinnyi barenga 90. Icyakora bamwe mu bakinnyi basanzwe bari mu bambere bagiye muri iyi kipe barimo Nshimiyimana Eric, Julien Ndagano, Nkunzingoma Ramadhani n’abandi.
APR FC yakinnye bwa mbere shampiyona mu mwaka 1995 ihita inatwara igikombe, kuva ubwo mu ntego z’iyi kipe hahise hajyamo gutwara ibikombe byose bitabiriye.
Mu myaka 32 imaze ishinzwe, APR FC yegukanye Igikombe cya Shampiyona isnhuro 23 arizo mu 1995, 1996, 1999, 2000, 2001, 2003, 2005, 2006, 2007, 2009, 2010, 2011, 2012, 2014, 2015, 2016, 2018, 2020, 2021, 2022, 2023, 2024 na 2025.
Yegukanye Igikombe cy’Amahoro inshuro 14, iyo mu 1994, 1996, 1999, 2000, 2002, 2006, 2007, 2008, 2010, 2011, 2012, 2014, 2017 na 2025. Iyi kipe kandi ifite CECAFA Kagame Cup ya 2004, 2007 na 2010.
Mu rwego rwo kwizihiza uyu munsi ku Mulindi haraba umukino wa gicuti uza guhuza Ikipe ya Mulindi iyobowe na CDS Mubarak Muganga n’ikipe y’akarere ka Gicumbi iba iyobowe n’umuyobozi w’akarere Nzabonimpa Emmanuel . Byitezwe ko kandi haza kuba hari Televiziyo za rutura ziba zirimo kwerekana igishushanyo mbonera cya sitade APR FC igiye kubaka i Shyorongi.
