Amakipe ya Chelsea na Aston Villa yo mu Bwongereza yahanwe n’Impuzamashyirahamwe y’Umupira w’Amaguru i Burayi (UEFA) kubera kurenga ku mategeko agenga imikoreshereze y’amafaranga mu mupira w’amaguru.
Aya makipe yombi ashobora kutemererwa kwandika abakinnyi bashya bazakina amarushanwa ya UEFA mu mwaka w’imikino wa 2025-2026, keretse habayeho inyungu zisobanutse mu igura n’igurisha ry’abakinnyi mbere y’uko isoko ryo mu mpeshyi rifungwa.
Chelsea yaciwe amande ya miliyoni 31 z’amayero (angana na miliyoni 26.7 z’amapawundi) kandi ishobora kwongerwa andi miliyoni 60 z’amayero (51.2m£) mu gihe yaba itubahirije amategeko mu gihe cy’imyaka ine iri imbere.
Aston Villa nayo yahanishijwe miliyoni 11 z’amayero (9.5m£), hamwe n’andi miliyoni 15 z’amayero (12.9m£) azongerwa mu gihe yaba itubahirije amategeko mu gihe cy’imyaka itatu iri imbere.
Izi mpamvu z’ihanishwa zijyanye n’itubahirizwa ry’amategeko ya UEFA agenga inyungu z’amakipe (football earnings rules), ndetse n’uko amafaranga yishyurwa abakinnyi n’abatoza arenze 80% by’umusaruro w’amakipe (squad cost ratio).
Chelsea iteganyijwe mu irushanwa rya Champions League umwaka utaha, naho Aston Villa ikazakina Europa League.
Mu itangazo ryasohowe na Chelsea, bagize bati:
“Ikipe yakoranye bya hafi kandi mu mucyo na UEFA, igatanga ibisobanuro birambuye ku bijyanye n’ibaruramari ryayo. Ibyo bigaragaza ko ubukungu bwa Chelsea buri mu nzira igana ku musaruro mwiza. Chelsea FC ifata ubufatanye bwayo na UEFA nk’ingirakamaro, ari nayo mpamvu yifuje ko ikibazo kirangira vuba binyuze mu masezerano yo kumvikana.”
Aya bihano yatanzwe n’Ishami rishinzwe kugenzura imari z’amakipe ya UEFA (CFCB).
CFCB yavuze ko inyungu ziturutse ku igurishwa ry’ibintu bifatika n’ibitari bifatika, cyangwa ku mpinduranya ry’abakinnyi (player swaps), cyangwa imigabane y’abakinnyi hagati y’amakipe agengwa n’uwigenga umwe (related-party transfers), zidashobora kubarwa mu musaruro w’ubukungu wemewe.
Chelsea yari yatanze inyungu mbere y’imisoro ingana na miliyoni 128.4 z’amapawundi muri Kamena 2024, harimo miliyoni 200 zavuye mu kugurisha ikipe y’abagore ku kindi kigo kiri muri BlueCo, sosiyete ibarizwamo Chelsea.
Iyi kipe yanagurishije amahoteli abiri ku yindi sosiyete iyishamikiyeho kugira ngo yujuje ibisabwa n’amategeko ya Premier League agenga inyungu n’imikoreshereze (PSR), ariko atandukanye n’ayashyizweho na UEFA.
Hari amakuru ko na Aston Villa ishobora kugurisha ikipe yayo y’abagore mu rwego rwo kuzuzanya n’aya mategeko ya PSR.
Chelsea imaze gukoresha miliyoni 150 z’amapawundi ku bakinnyi batanu bashya mu mpeshyi y’uyu mwaka, mu gihe Aston Villa itaratangaza igura rikomeye.
Aya makimbirane ashobora no kugira ingaruka kuri Crystal Palace, ishobora kutitabira Europa League y’umwaka utaha bitewe n’amategeko ya multi-club ownership (MCO) ajyanye no kugira nyiri ikipe umwe ufite imigabane mu yindi, aho bivugwa ko umucuruzi w’umunyamerika John Textor ari mu bibazo bifitanye isano n’ibyo.