Neymar Jr yujuje uruhare rw’ibitego 700 kuva atangiye gukina umupira w’amaguru nkuwabigize umwuga nyuma y’igitego yatsinze mu mukino ikipe ya Santos akinira yatsinzemo Flamengo 1-0.
Umukinnyi w’umupira w’amaguru w’umunyaburezire, Neymar da Silva Santos Júnior w’imyaka 33, akaba yakinaga umukino we wa 732 kuva yatangira gukina, muri iyo mikino yose akaba yaratsinzemo ibitego 443, atanga imipira yavuyemo ibitego 257, wabiteranya bikaba uruhare rw’ibitego 700.
Uyu mugabo yatangiye gukina umupira mu ikipe ya Santos y’iwabo muri Brazil mu 2009 ayivamo 2013 akaba yarayikiniye imikino 230 ayitsindira ibitego 136 n’imipira yavuyemo ibitego 65, muri FC BARCELONA 2013-17 yayikiniye imikino 186, atsindamo ibitego 105 n’imipira yavuyemo ibitego 76, yavuye aho yerekeza muri PSG, aho yakinnye imikino 173, atsindamo ibitego 118 n’imipira yavuyemo ibitego 77 mu myaka 6 yahamaze (2017-23), muri 2023 yerekeje mu Barabu mu ikipe ya Al hilal aho yahise agira imvune, bituma ayikinira imikino 5 atsinda igitego kimwe n’umupira umwe wavuyemo igitego.
Mu ikipe y’igihugu ya Brazil, Neymar amaze gukina imikino 128, ayitsindira ibitego 79 n’imipira yavuyemo ibitego 56, ibyo bimugira umukinnyi watsindiye ibitego byinshi kurusha abandi mu ikipe y’igihugu ya Brazil aho arusha Umwami w’umupira Pele.
Kuri ubu Neymar akinira Santos, yasubiyemo nyuma y’uko batandukanye na Al hilal agahitamo kujya gusoreza umupira mu ikipe yamumuritse ku mugabane w’iburayi.