Azam FC yo muri Tanzania yasinyishije amasezerano y’imyaka 3 umunyezamu mwiza Aishi Salim Manula yakuye muri Simba SC yakinnyemo imyaka 7.
Uyu mugabo w’imyaka 29, yagiye muri Simba Sports Club mu mwaka wa 2017, nyuma y’imyaka itanu akinira Azam FC.
Mu myaka 7 amaze muri Simba yatwaranye nayo ibikombe bine bya shampiyona y’igihugu ya Tanzania, Tanzania Premier League, ibikombe bitatu by’igihugu, FA Cup, igikombe kimwe cya Mapinduzi Cup n’ibikombe bine biruta ibindi muri Tanzania, Community Shield.
Naho mu marushanwa ategurwa n’ishyirahamwe ry’umupira w’amaguru muri Afurika, CAF Champions League na CAF Confederation Cup naho yitwaye neza aho yageze mu mikino ya kimwe cya Kane cy’irangiza inshuro enye muri CAF Champions League, ni mugihe yageze ku mukino wa nyuma wa CAF Confederation Cup muri uyu mwaka wa 2025, nubwo atabanzagamo.
Uyu munyezamu agarutse muri Azam yatangiriyemo gukina umupira w’amaguru, aho yakiniye iyi kipe kuva mu mwaka wa 2012 kugeza mu 2017, aho yayivuyemo akajya muri Simba SC mu mwaka wa 2017.
Ku rwego mpuzamahanga, Manula akinira ikipe y’Igihugu ya Tanzania (Taifa Stars). Akaba yarahamagawe mu ikipe y’igihugu bwa mbere mu mwaka wa 2015, aho amaze guhamagarwa inshuro 51.