Umuryango w’Ubukungu w’Ibihugu byo muri Afurika y’Iburengerazuba (ECOWAS) wizihije isabukuru y’imyaka 50 ushinzwe, mu birori byabereye i Lagos, byatangijwe ku mugaragaro na Perezida wa Nigeria, Bola Ahmed Tinubu, akaba n’umuyobozi w’uyu muryango muri iki gihe.
Mu ijambo rye, Perezida Tinubu yasabye ibihugu bigize ECOWAS kongera ubufatanye mu kurwanya ibibazo by’umutekano muke, iterabwoba, n’ihungabana ry’ubukungu. Yagize ati: “Umutekano si igitekerezo cy’inyongera, ahubwo ni inshingano y’ibanze y’umuryango wacu.”
Mu rwego rwo kugaragaza aho ECOWAS yavuye n’aho igeze, hanatanzwe ibiganiro by’ubusesenguzi birimo n’ijambo ryatanzwe na Jenerali Yakubu Gowon, umwe mu bashyize umukono ku masezerano y’ishingwa rya ECOWAS mu 1975. Yashimye intambwe imaze guterwa, anasaba abayobozi gukomeza umurongo wo guteza imbere ubumwe n’ubufatanye.
Perezida wa Komisiyo ya ECOWAS, Dr. Omar Alieu Touray, yashimye Nigeria ku bw’uko yatanze 100% y’umusanzu wayo w’umwaka wa 2023 ndetse n’uw’2024 kugeza muri Nyakanga, asaba ibindi bihugu gukurikiza uwo murongo kugira ngo ibikorwa by’umuryango bigende neza.
Isabukuru y’imyaka 50 ya ECOWAS yibanze ku gusigasira amahoro n’iterambere birambye, no gukomeza kubaka ubufatanye bukomeye hagati y’ibihugu bigize akarere ka Afurika y’Iburengerazuba.
