Iki ni kimwe mu bibazo abakobwa benshi bibaza, cyane cyane iyo bumvise inkuru z’urukundo zijyanye n’abantu bakomeye. Kuri benshi, urukundo rusigaye rwumva mu buryo bushingiye ku rwego rw’imibereho, ubukire, amashuri cyangwa ubwamamare. Ariko se, koko urukundo nyarwo rugendera kuri ibyo byose?
Mu by’ukuri, urukundo rw’ukuri ntirubaza impamyabumenyi, inkomoko, cyangwa izina ry’umuryango. Iyo umutima ukunze, ukunda umuntu uko ari, atari ibyo afite. Hari abavuga ko urukundo rutagira isura, rutagira icyiciro, kandi rutajya mu mashuri cyangwa mu myanya y’akazi. Ni ibyiyumvo biva ku mutima bigahuza abantu babiri, kabone n’ubwo baba bari mu byiciro binyuranye by’imibereho.
Minisitiri ashobora gukundana n’umukobwa usanzwe, utarize cyane, utari uzwi mu gihugu, ariko ufite ubupfura, ubwenge kamere, umutima mwiza n’icyerekezo. Umuyobozi ashobora guhura n’uwo mukobwa mu buryo butunguranye, nk’igihe hari ibikorwa by’iterambere, inama rusange, cyangwa se mu buzima busanzwe aho babonana amaso ku maso bakaganira nk’abantu bityo hakavuka urukundo. Ntabwo ari igitinyiro cyangwa icyubahiro umuntu afite kigena uwo agomba gukunda, ahubwo imico n’imyitwarire ni byo bikora ku mutima.
Hari abavuga ko abakobwa baturuka mu miryango isanzwe bakunze kurangwa no kwiyoroshya, kwitanga no kwita ku bandi, ibintu by’ingenzi umuyobozi ashobora gukururwa na byo. Ashobora gukundira umukobwa uko amutega amatwi, uko yicisha bugufi, uko avuga cyangwa uko yitwararika, kurusha uko yakundira umuntu amenyereye ku rwego rwe.
Ariko na none, ntiwakwibagirwa ko urukundo nk’urwo rushobora kuzamo igitutu gikomeye. Iyo umuntu ari mu buyobozi, buri gikorwa cye kiravugwa. Hari abavuga ko bitashoboka, ko umuyobozi agomba gukundana n’undi wo ku rwego rwe, bakavuga ko umukobwa usanzwe atakwihanganira igitutu cy’ubuzima bw’umuyobozi, abandi bagatekereza ko yaba amushakaho amafaranga cyangwa izina. Iyi ni imyumvire imaze imyaka, ariko itagombye kubuza abantu gukundana ku buryo bw’ukuri.
Urukundo rw’ukuri ruca imipaka yose. Ntirureba uko umuntu yambaye cyangwa uko yanditse ku rupapuro rw’amateka. Rureba umutima, rureba ukuri, rureba umuntu. Niba Minisitiri akunze umukobwa usanzwe, akamukunda kubera umutima we, uburyo amwitaho, n’uko amwumva, ubwo ni urukundo rw’ukuri. Ni urukundo rutagendeye ku nyungu, rutayobowe n’igitsure cy’amategeko y’imibereho, ahubwo ruturuka ku guhuza kw’imitima ibiri.
Ubukire bushobora gushira, imyanya ishobora guhinduka, ariko umutima ukunze by’ukuri uraramba. Urukundo nyakuri si urwo gushakisha icyo umuntu afite, ahubwo ni ukurambagiza uwo ari we. Si ukumva uko abandi babibona, ahubwo ni uko umutima wawe ubyumva.
Ese wowe wemera ko umukobwa wo hasi ashobora gukundwa n’umuyobozi uri hejuru atagamije indonke? Wigeze wumva inkuru y’urukundo rutangaje nk’iyo? Sangira igitekerezo cyawe kuri Lazizi news, aho urukundo rutagira igipimo rubonerwamo.