Mu myaka ishize, kubona serivisi z’ubuvuzi n’uburezi byasabaga igihe kinini, urugendo rurerure, n’amikoro menshi. Uko imyaka yagiye ihita, ikoranabuhanga ryatangiye kugira uruhare rukomeye mu koroshya izi serivisi. Iri koranabuhanga riragenda riba inkingi ikomeye mu guteza imbere imibereho y’abaturage. Abaturage batangiye kugera kuri serivisi z’ubuzima n’amashuri mu buryo bwihuse, buhendutse kandi buzira ubuziranenge. Ibi byose biri gufasha igihugu kwihuta mu nzira y’iterambere rirambye.
Mu rwego rw’ubuvuzi, hari impinduka nyinshi zigaragara zishingiye ku ikoranabuhanga. Kwivuza byaroroshye abarwayi basigaye bavugana n’abaganga bifashishije telefoni, bitabasabye kugera kwa muganga. Ibi byagabanyije urugendo n’amafaranga byakoreshwaga n’abatuye bajyenda urugendo rurerure ku bigonderabuzima. Ubu buryo bworohereza abantu benshi kubona ubujyanama bw’ubuvuzi mu gihe gito. Ikoranabuhanga ryegereje ubuvuzi abaturage mu buryo bwagaragaje impinduka.
Ibitaro byinshi byatangiye gukoresha uburyo bwa dosiye z’abarwayi zibitse mu ikoranabuhanga, buzwi nka EMR. Ubu buryo butuma abaganga babona amakuru yose y’umurwayi mu gihe gito. Ibi bigabanya amakosa yo mu buvura ndetse bikongera ubuziranenge bw’ubuvuzi butangwa. Bituma kandi habaho gukurikirana umurwayi neza, nko mu gihe cy’ubuvuzi buhoraho. Uburyo nk’ubu burimo guteza imbere ireme ry’ubuvuzi mu gihugu hose.
Minisiteri y’ubuzima yatangije gahunda zishingiye ku gukusanya no gusesengura amakuru kugira ngo hamenyekane indwara zihari hakiri kare. Hifashishwa sisitemu zifasha mu gukurikirana uko indwara zikwirakwira n’aho zigaragara. Ibi bituma inzego z’ubuzima zifata ingamba z’ubwirinzi vuba ndetse bigabanya ibyago by’ibyorezo. Iri koranabuhanga rifasha kandi mu igenamigambi ry’ubuvuzi rishingiye ku makuru yizewe. Ubu buryo burimo kongerera ubushobozi inzego z’ubuzima mu guhangana n’ibibazo bitunguranye.
Mu burezi, ikoranabuhanga naryo ryatangiye guhindura uburyo amasomo atangwa mu gihugu. Amasomero menshi ubu afite mudasobwa, interineti zibafasha kwiga neza. Iyi gahunda yatumye abana benshi babonera amasomo igihe. Uko ikoranabuhanga rikomeza kwinjira mu mashuri, ni nako ryongera ubushobozi bw’abarimu n’abanyeshuri. Ibi bifasha mu kurushaho kunoza ireme ry’uburezi.
Abarimu baragenda bahabwa amahugurwa ku ikoreshwa ry’udushya tw’ikoranabuhanga mu myigishirize, bibafasha kwigisha, gutanga ibizamini, ndetse no kugenzura iterambere ry’abanyeshuri. Uburyo bwo kwigisha bwarahindutse, bugera ku rwego rwo gufasha abanyeshuri gutekereza no guhanga udushya. Ibi byongera ubushobozi bwabo bwo guhangana n’isoko ry’umurimo rihindagurika. Kwigisha hifashishijwe ikoranabuhanga bibafasha guhuza ubumenyi n’ibikenewe ku isoko.
Ikoranabuhanga kandi ryafashije abanyeshuri gukomeza amasomo no mu bihe bitari byoroshye, nka COVID-19. Urubuga rwa e-learning, amahugurwa anyura kuri videwo, n’amasomo ya kure byarakoreshejwe cyane. Ibi byatumye hatabaho gutakaza igihe kinini, kandi abanyeshuri bakomereza kwigira mu ngo zabo. Uburyo bw’amasomo y’iyakure buragenda bwaguka kandi bwemerwa n’abarezi n’ababyeyi. Ubu buryo burimo kugabanya icyuho cy’ubumenyi hagati y’abatuye mu mijyi no mu byaro.
Ikoranabuhanga mu burezi no mu buvuzi ririmo kunganira imbaraga za leta mu kugabanya ubusumbane. Abaturage batuye mu bice by’icyaro baragenda bagira amahirwe angana n’abatuye mu mijyi. Umwana wiga kure y’umujyi ashobora kubona amasomo nk’uwiga mu mashuri yisumbuye afite ibikoresho bihagije. Umuntu wese ashobora kuvugana n’umuganga cyangwa kubona isomo nta nkomyi. Ibi byose bigaragaza ko ikoranabuhanga ari urufunguzo rw’iterambere rirambye.
Uko igihugu gikomeza gushora imari mu ikoranabuhanga, ni nako abaturage barushaho kugira uruhare mu iterambere ry’igihugu. Abaturage bamenya uko bakoresha iryo koranabuhanga mu rwego rwo kwita ku buzima bwabo no kongera ubumenyi. Gushyira imbere ikoranabuhanga ni ugushyira imbere ejo hazaza h’igihugu. Uruhare rwaryo mu burezi n’ubuvuzi rurigaragaza cyane, kandi rugomba kurushaho gushyigikirwa. Ni yo nzira izatuma abantu babona iterambere rihamye kandi rirambye.