Mu gihe hari hashize imyaka myinshi umubano hagati ya Israel na Syria urangwa no kutizerana, amakuru mashya yemeza ko impande zombi zatangiye ibiganiro by’ibanze bigamije guhagarika amakimbirane akomeje kugaragara ku mipaka.
Aya makuru yemejwe n’intumwa yihariye ya Perezida Donald Trump mu Burasirazuba bwo hagati, Thomas Barrack, wavuze ko Leta Zunze Ubumwe za Amerika ari zo ziri gutanga ubuhuza muri ibi biganiro.
Ibi biganiro birimo gukorwa mu ibanga rikomeye, ntibiragera ku rwego rwo kwicarana ku meza hagati y’abakuru b’ibihugu cyangwa ba Minisitiri b’Ububanyi n’Amahanga. Gusa, Barrack yavuze ko ibiganiro bihari kandi biganisha ku masezerano y’igihe kirekire yo guhosha intambara ku mupaka wa Syria na Israel, cyane cyane mu duce twa Golan Heights. Iki gice cyigaruriwe na Israel kuva mu 1967, kikaba kigifatwa na Syria nk’akarere kayo katigeze kavanwaho uburenganzira.
Uruhare rwa Amerika muri aya masezerano rugaragaza ubushake bwo kongera kugirana umubano n’ubutegetsi bwa Syria, nyuma y’imyaka myinshi ibihugu byombi bifitanye umubano mubi. Byongeye kandi, Leta ya Amerika iherutse kuzamura ibendera ryayo kuri Ambasade y’i Damascus nk’ikimenyetso cy’uko ishaka gukomeza guhura n’inzego za Syria mu buryo bwa dipolomasi, nk’uko byatangajwe na Reuters ku wa 29 Gicurasi 2025.
Ibi biganiro by’ibanze bikomeje nyuma y’urugendo rwa Perezida Trump muri Riyadh, aho yakanguriye ibihugu by’Abarabu n’ibyo mu karere kongera kubaka umubano na Israel binyuze mu masezerano azwi nka Abraham Accords. Nubwo Syria itigeze yitabira ayo masezerano, ibimenyetso birimo kujya ahabona ko hari ubushake bwo kuganira na Israel, mu gihe hari icyo ishobora kugeraho ku kibazo cy’umutekano n’inyungu z’akarere.
Hari amakuru avuga ko ibiganiro biri kwibanda ku bijyanye n’amasezerano y’igihe gito yo guhagarika imirwano, ariko bigashobora no kwaguka bikagera ku masezerano arambye y’amahoro arimo kugena uko ingabo z’ibihugu byombi zigenzura imipaka. Bivugwa kandi ko Israel ishishikajwe no kubuza ko Iran n’imitwe iyishamikiyeho, nk’umutwe wa Hezbollah, bakomeza gukorera ibikorwa bya gisirikare muri Syria hafi y’umupaka.
Ku ruhande rwa Syria, intumbero y’ibi biganiro ishobora kuba ishingiye ku gushaka kongera ubushobozi bwayo mu rwego rwa dipolomasi no gusubirana n’amahanga nyuma y’imyaka irenga 10 y’intambara y’abenegihugu n’ibihano mpuzamahanga. Ku ruhande rwa Israel, kugabanya igitutu cy’umutekano ku mupaka wa Syria byaba intambwe ikomeye mu guharanira ituze ry’akarere, cyane cyane mu bihe bya politiki mpuzamahanga bikomeje kwivanga mu bibazo byo mu Burasirazuba bwo hagati.
Nubwo kugeza ubu nta cyemezo cyafashwe cyangwa se amasezerano yashyizweho umukono, ibiganiro hagati ya Syria na Israel bifashijwe na Leta Zunze Ubumwe za Amerika bigaragaza ko hari icyizere gishya cyo kugera ku mahoro arambye. Abasesenguzi bemeza ko hakenewe ubushishozi no gukomeza ibiganiro mu bwitonzi, kugira ngo hatagira icyongera gusubiza inyuma urwo rugendo rutoroshye.