Linda Yaccarino, wari Umuyobozi Mukuru (CEO) w’urubuga rwa X rwahoze rwitwa Twitter, yeguye ku mirimo ye nyuma y’imyaka ibiri ayoboye uru rubuga rwa Elon Musk.
Yaccarino yinjiye muri X mu 2023, nyuma yo kuva mu buyobozi bukuru bw’ikigo cya NBCUniversal, aho yari azwi nk’umuyobozi ukomeye mu bijyanye n’itangazamakuru no kwamamaza. Yari yitezweho gufasha Elon Musk guhuza imikorere ya X n’inyungu z’amasosiyete y’ubucuruzi no kugarura abamamaza ku rubuga rwari rwaratakaje icyizere.
Nubwo impamvu nyamukuru yeguye itaratangazwa ku mugaragaro, bamwe mu bakurikirana iby’imiyoborere bavuga ko ashobora kuba yarahuye n’imbogamizi mu guhuza icyerekezo cye n’imitekerereze ya Elon Musk, umenyereweho gufata ibyemezo bikakaye no guhindura ibintu mu buryo butunguranye.
Ku rubuga rwa X, hatangiye kuvugwa ko Musk ashobora kongera gufata inshingano zo kuyobora uru rubuga by’agateganyo, mu gihe hategerejwe undi muyobozi mushya.
Linda Yaccarino yagiye ashyirwa mu majwi n’abantu bamwe bashidikanyaga ku ruhare rwe mu ifatwa ry’ibyemezo bikomeye, bamwe bakavuga ko yabaye umuyobozi utagaragara cyane mu ruhame ugereranyije n’uko byari bitegerejwe.
Uku gusezera kwe bizagira ingaruka ki ku miterere n’ahazaza ha X? Biracyari kare kubivuga, ariko biragaragara ko uru rubuga rukomeje guhindura isura n’imiyoborere, mu gihe Elon Musk akomeje gushaka uko yarufasha guhaza intego ze za tekinoloji, ubwisanzure bwo gutanga ibitekerezo, n’imikorere y’ubucuruzi.