Nyuma y’imyaka itatu yuzuyemo urukundo ruhamye, ubwitange no guharanira inzozi zihuriweho, Byamungu Dieudonne Marshall na Irabaruta Claudine Dinah basezeranye imbere y’Imana n’abantu, mu birori by’akataraboneka byabereye i Kigali ku wa 12 Nyakanga 2025.
Urukundo rwabo rwatangiye mu buryo butuje, rushingiye ku kumenyana, gusabana no kungurana ibitekerezo birenga ibyo abantu benshi bita urukundo rusanzwe. Imiryango yombi yarahuye, irasurana, irasangira, kugeza igihe Byamungu na Claudine bafashe icyemezo cyo kurushinga burundu. Iyo myaka itatu yabaye ishuri ry’urukundo, ubwubahane no gukura mu bitekerezo, mbere y’uko babishyira ku mugaragaro.
Umunsi nyirizina w’ubukwe waranzwe n’ibirori bihamye, byatangiye n’umuhango wo gusaba no gukwa wabereye mu busitani bwa Igitego Hotel. Ni umuhango wakoranyije imiryango yombi, inshuti n’abavandimwe, hakubahirizwa umuco nyarwanda: amagambo y’icyubahiro, imbyino za gakondo, n’impano zatanzwe mu rwego rwo kwemeza ko umukobwa ahabwa umuryango w’umugabo. Umuryango wa Claudine wamutanze mu mucyo, amusabira umugisha ndetse anamugira inama z’ubuzima bushya agiyemo.
Byakurikiwe n’umuhango ukomeye wo gusezerana imbere y’Imana wabereye mu rusengero rwa Four Square Gospel Church i Kimironko. Aha ni ho Byamungu na Claudine bagize indahiro ishimangira isezerano ryabo: ko bazabana mu byiza no mu bikomeye, mu burwayi no mu buzima bwiza, kandi ko bazatandukanywa n’urupfu gusa. Abo babibwiye si abantu gusa, ahubwo babihamije imbere y’Imana, bashyira umukono ku mpapuro z’isezerano ritagatifu. Umwigisha yabahaye umugisha, itorero rirabashyigikira, maze basohoka nk’umugabo n’umugore.
Ibirori byakomereje ku Igitego Hotel, aho abatumiwe basangiye ibyishimo byimbitse. Hari amafunguro meza, indirimbo ziryoshye, imbyino, amagambo y’urukundo n’impano zitandukanye zatanzwe n’ababyeyi, inshuti n’abavandimwe. Buri wese wari aho yagaragaje ko yishimiye aba bageni n’urugendo rwabo. Hari udushya twinshi twatumye ubukwe bwabo buhora mu mitima ya benshi: uburyo bwateguwe, uko abageni basa, uko basekaga, n’uburyo ababyeyi babo bahawe icyubahiro kibagomba.
Urugo rushya rwatangiriye ku musingi ukomeye Ubukwe bwa Byamungu na Claudine ntibwari ugusezerana gusa, ahubwo bwari no gushima Imana n’ababyeyi, Bagaragaje urukundo rwuzuye hagati yabo, ndetse bashimira cyane inshuti n’imiryango yababaye hafi kuva batangira urugendo rwabo kugeza ku munsi w’ubukwe. Impano zatanzwe ntizari gusa ibifatika, ahubwo zari n’ibisobanuro by’urukundo n’inkunga y’amarangamutima.
Lazizi News ibifurije urugo ruhire, rwuzuye amahoro, urukundo, ubwubahane, n’umugisha udashira. Imana ibahe kuramba, gusabana no kuba icyitegererezo cy’urubyiruko n’imiryango izavuka muri bo.