Umubare w’abanduye icyorezo cya COVID-19 barwaye ubu mu Buhinde wageze ku bantu barenga 5,000, nk’uko byemejwe n’ibiro bishinzwe ubuzima mu gihugu. Iyi mibare yatangajwe mu gihe Leta zimwe na zimwe zikomeje kwiyongeranyamo abagaragaweho n’ubu burwayi, cyane cyane muri Kerala, Delhi na Bengal y’Iburengerazuba.
Nk’uko bitangazwa na Minisiteri y’Ubuzima y’u Buhinde, kuri uyu wa Gatanu tariki ya 6 Kamena 2025, abanduye COVID-19 bari 5,235, benshi muri bo barimo kwitabwaho mu ngo zabo mu buryo bwo kwishyira mu kato (home isolation), mu gihe abandi bari mu bitaro.
Umuyobozi muri Minisiteri y’Ubuzima yavuze ko nubwo imibare yazamutse, nta mpungenge zidasanzwe zihari kuko abenshi barwaye bafite ibimenyetso bidakomeye. Yavuze ko Leta iri gukurikirana ubwandu bushya bw’icyorezo bushobora kuba bufitanye isano n’ubwoko bushya bwa virusi.
Leta ya Kerala, izwiho kugira imbaraga mu guhangana n’indwara z’ibyorezo, iri imbere mu kugira abarwayi benshi bashya. Iyi leta ikurikirwa na Delhi, umurwa mukuru w’igihugu, ndetse na West Bengal, aho imibare y’abandura nayo ikomeje kwiyongera cyane cyane mu mijyi.