Urukundo nyakuri ni ijambo rikomeye, ariko iyo urebye umubyeyi, risobanuka mu buryo bugaragara. Umubyeyi yitanga adategereje igihembo, akakwereka urukundo mu bikorwa aho amagambo atagera. Mu gihe isi ishobora kukwirengagiza, umubyeyi ahora ahari avuga, yumva, aguhumuriza. Uretse kukureberera, aguhagararaho no mu bihe bikomeye. Nta kindi kiremwa gifite impuhwe nk’iz’umubyeyi.
Umwana agihumeka bwa mbere, umubyeyi ahita amwakira mu mutima we no mu buzima bwe bwose. Icyo gihe, haba hatangiye urugendo rw’urukundo rudacogora. Ni urukundo rwubaka isano itanyeganyezwa, ishingiye ku kwitanga, kwihangana, no guharanira ibyiza by’umwana. Nta mubyeyi wabona ibitotsi umwana we arwaye cyangwa akeneye ubufasha. Ni yo mpamvu urukundo rw’umubyeyi rufatwa nk’inkingi y’imibereho ya muntu.
Mu buzima bwa buri munsi, umubyeyi yitanga atizigamye kugira ngo abana be bagire ubuzima bwiza. Akarinda, agira inama, atanga ibyo afite byose, rimwe na rimwe atitaye ku buzima bwe. Kugira ngo umwana agire imibereho mwiza, abone imyambaro ndetse yige neza, umubyeyi ashobora kwihanganira byinshi. Ibyo byose abikorana umutima mwiza n’umunezero kuko aba akunda. Urwo ni rwo rukundo nyarwo rurenga amagambo rukajya mu bikorwa.
Impuhwe z’umubyeyi zigaragarira mu buryo yumva umwana we atamubwiye. Aba azi igihe umwana afite agahinda, n’ubwo yaba atavuga. Aha agaciro amarangamutima y’umwana, akamwumva, akamuba hafi, kandi akamufasha gukura yisanzuye. Umubyeyi w’ukuri ahora ateze amatwi, atanga ubuvuzi bw’amarangamutima n’impanuro zubaka. Ni indorerwamo y’urukundo rutagira umupaka.
Iyo umwana akura azi ko akunzwe kandi yitaweho, bimwongerera icyizere n’umutekano mu mutima. Aha ni ho havuka umuntu wiyubashye, ukunda abandi, kandi ushobora kwitanga. Urukundo rwa nyina cyangwa se rwa se, ni rwo rutoza umwana uko agomba gukunda no gukundwa. Nta rindi somo riruta urukundo rw’umubyeyi mu buzima bwa muntu. Ni isomo ridatanga impamyabumenyi ariko rikubaka ubuzima bwose.
Ababyeyi benshi bakora byinshi bitagaragara mu maso ya benshi, ariko bifite agaciro gakomeye. Bashobora kuba batavugwa mu bitangazamakuru, ariko ibikorwa byabo ni byo bigira isi nziza. Gukora ijoro n’amanywa, kwihanganira uburibwe, no kurwana no gushakira abana ubuzima bwiza, ni bimwe mu bikorwa byabo bya buri munsi. Kuri bo, gukunda si amahitamo, ni inshingano. Uru rukundo rutagira umupaka ni rwo rutuma abana bacu bagira ahazaza heza.
Iyo abantu bavuze urukundo rutagira uburyarya, rudasaba byinshi, rutajya ruhinduka baba bavuga urukundo rw’umubyeyi. Ni urukundo rubabarira, ruhumuriza, runasaba, ariko ntirushiraho. N’iyo umwana yaba yakoze ibibi bingana gute, umubyeyi ahora yiteguye kumwakira, kumugira inama no kumugarura mu nzira nziza. Ni urukundo rutagira akagero, rwihanganira byose, kandi rugahora ruri hafi. Ni wo musingi w’urukundo rwa kibyeyi.
Uko isi ikomeza guhindagurika, abantu barushaho kwibagirwa agaciro k’ababyeyi. Abenshi barajijutse, bariga, bagira impamyabumenyi, ariko bibagirwa ko ari imbaraga n’ubwitange bw’umubyeyi byose byatangiriyeho. Ni ingenzi ko twubaha impuhwe z’ababyeyi bacu, tukazishimira, kandi tukazisigasira. Gushima umubyeyi si ukubiririmba mu magambo ahubwo n’ ukumwereka ko ibyo yakoze bifite icyo byatanze. Ni ukwibuka neza ko urukundo rwe arirwo rwatwubatse.
Umubyeyi ni ishusho ya kamere y’Imana mu rukundo. Urukundo rw’umubyeyi rurinda utari yimenya, rukaguhitiramo icyiza mbere yo kukubaza, rukakwereka ko utari wenyine. Ubusobanuro nyakuri bw’urukundo bugaragarira mu byo umubyeyi akora buri munsi bikomeye ariko bisa n’ibisanzwe. Reka twubahe ababyeyi bacu, twigishe abandi kubaha impuhwe zabo, kandi twigishe urukundo nyarwo ruturutse kuri bo. Kuko nta rukundo rurenze urw’umubyeyi.