Mu mwaka wa 2020, umuhanzi w’Umunyamerika ukomoka muri Senegal, Akon, yatangaje umushinga uteye amatsiko n’inzozi zo kubaka umujyi w’ejo hazaza witwa Akon City, uherereye hafi y’umujyi wa Mbour, muri kilometero 100 uvuye i Dakar.
Uwo mujyi wari gutangirwamo serivisi zose zigezweho: amashuri, ibitaro, ibibuga mpuzamahanga, amazu agezweho, ibikorwaremezo bikoresha ingufu zisubira, ndetse n’ikoreshwa rya kriptomoney yihariye yitwa Akoin. Umushinga wari ufite agaciro gakabakaba miliyari 6 z’amadolari y’Abanyamerika, akaba waravuzweho cyane nk’uteye imbere kurusha indi yose yatekerejwe na mugenzi we wo muri Afurika.
Icyakora, uko imyaka yagiye ihita, uyu mushinga watangiye kugaragaramo igisa n’ihungabana. Kuva batangaza uwo mushinga, ibikorwa bifatika byabaye bike cyane. Akon yari yaremeye kugirana amasezerano na Leta ya Senegal yo guhabwa ubutaka bungana na hegitari 55 mu gace ka Mbodiène. Nyamara, kugeza mu mpera za 2024, abashakashatsi n’itangazamakuru birimo BBC na Le Monde batangaje ko nta bikorwa bifatika byigeze bikorwa kuri ubwo butaka uretse aho bise “Akon City Welcome Center” hatarangiye neza.
Ikigo cya leta cya Senegal gishinzwe ubukerarugendo, cyitwa SAPCO, cyatangaje ko gifite impungenge zikomeye ku bijyanye n’aho uwo mushinga ugeze. Icyo kigo cyavuze ko igihe ntarengwa cyahawe Akon ngo atangire ibikorwa bifatika kirimo kurangira. Niba bitagezweho mbere ya Nyakanga 2024, ubutaka bushobora kugaruzwa na leta, kugira ngo bukoreshwe mu bindi bikorwa bifitiye igihugu akamaro.
Icyagaragaye ni uko umushinga wa Akon wari wateguwe mu buryo butarimo igenamigambi rifatika ry’ishyirwa mu bikorwa, kandi amafaranga yari yatangajwe atigeze aboneka uko bikwiye. Akon ubwe yemeye ko bagize ibibazo by’ishoramari n’imyiteguro, ariko avuga ko atigeze areka inzozi ze zo kubaka uwo mujyi, nubwo bitagenda nk’uko yabyifuzaga mu ntangiriro. Ariko, amakuru yemejwe na BBC avuga ko abaturiye aho uwo mujyi wagombaga kubakwa bavuga ko bamaze imyaka myinshi bategereje igikorwa na kimwe, nyamara bakomeza kubona ubutaka butarimo iterambere iryo ari ryo ryose.
Iyi nkuru ishimangira ikibazo gihari mu mishinga y’inzozi ishingiye ku bwamamare budafite ishingiro rihamye ry’imari n’ubushobozi bwo gushyira mu bikorwa. Nubwo Akon yari afite icyerekezo cyiza, ikibazo cy’ubushobozi bw’imari, igitutu cy’abaturage n’ubuyobozi, ndetse n’ibura ry’abafatanyabikorwa b’abashoramari cyabaye inzitizi ikomeye ku ishyirwa mu bikorwa ry’uwo mushinga.Kugeza ubu, umujyi wa Akon ubaye nk’inzozi zahindutse igicucu.
Mu gihe nta gihindutse, biragaragara ko Senegal ishobora kwisubiza ubutaka yari yahaye uwo muhanzi, maze igashaka abashoramari bashobora kugera ku bikorwa bifatika, bihuye n’iterambere igihugu cyifuza kugeraho.